कर्णाली नदीमा बेपत्ता टीकापुरका युवकको एक हप्तापछि शव फेला
मानबहादुर ठकुल्ला । टीकापुर
कर्णाली नदीमा नुहाउन गएको बेला डुबेर बेपत्ता भएका कैलालीका एक युवकको शव एक हप्तापछि फेला परेको छ ।
भारतबाट तिहार मनाउन घर आएका बेला १७ कार्तिकमा कर्णाली नदीमा बगेर बेपत्ता भएका टीकापुर नगरपालिका ७ सत्तीका २२ वर्षीया विशाल चौधरीको शव शुक्रबार सत्तीघाट पुलभन्दा करिव ५०० मिटर दक्षिणमा रहेको टापुमा अडकिएको अवस्थामा फेला परेको प्रहरी चौकी सत्तीका प्रमुख प्रहरी वरिष्ठ नायव निरीक्षक टेकबहादुर चन्दले जानकारी दिए । शबलाई प्रहरी मुचुल्का उठाइ पोष्टमार्टमका लागि टीकापुर अस्पताल पठाउने तयारी गरेको छ ।
सत्ती कर्णाली सामुदायिक वनसंगै रहेको कर्णाली नदीमा चौधरी तीन जना साथीसँगै नुहाउन गएका बेला दिउँसो ३ बजे बगेर बेपत्ता भएका थिए । अन्य ३ जना साथी भने सकुशल घर फर्केका थिए ।
चौधरी अविवाहित हुन् । उनको ११ जनाको परिवार छ ।
