टीकापुर-५ ले जित्यो वडा स्तरीय फुटबलकोे उपाधि
मानबहादुर ठकुल्ला । टीकापुर
कैलालीको टीकापुर नगरपालिकामा जारी वडा स्तरीय फुटबल प्रतियोगिता-२०८१ को उपाधि टीकापुर-५ ले जित्न सफल भएको छ ।
टीकापुर-८ स्थित त्रिभुवन माध्यमिक विद्यालय बटनपुरको खेल मैदानमा जारी प्रतियोगिताको आइतबारको भएको फाइनल खेलमा टीकापुर-५ ले टीकापुर-८ बी लाई शून्यका विरुद्ध १ गोलले पराजित गरेको हो ।
कार्यक्रमका प्रमुख अतिथि टीकापुर नगरपालिकाका नगर प्रमुख रामलाल डगौरा थारूले विजेता वडा नं. ५ लाई ५१ हजार रुपैयाँ, शिल्ड, मेडल र प्रमाण पत्र प्रदान गरेका थिए । उप-विजेता टीकापुर-८ बीलाई ३१ हजार रुपैयाँ, शिल्ड, मेडल र प्रमाण पत्र प्रदान गरियो ।
वडा स्तरीय खेलकुद समितिका अध्यक्ष खगेन्द्रप्रसाद उपाध्यायको अध्यक्षतामा समितिका सचिव वीरु साउँदको स्वागत मन्तव्यसँगै सुरु भएको समापन समारोहमा नेपाली काङ्ग्रेसका शेरबहादुर साउँद, नेकपा माओवादी केन्द्रका नगर अध्यक्ष धनसिंंह साउद, टीकापुर ८ का वडाध्यक्ष दीर्घबहादुर ठकुल्ला लगायतले धारणा राखेका थिए ।
वडा स्तरिय खेलकुद समिति वडा न ८ को आयोजना र टीकापुर नगरपालिका लगायत वडा नं ६, ७, ८ र ९ को आर्थिक सहयोगमा फुटबल प्रतियोगिता सञ्चालन भएको थियो । प्रतियोगितामा टीकापुर नगरपालिकाका १५ वटा टिमको सहभागिता रहेको थियो ।
