नेपालगन्जमा सुरु भयो महिला सम्बन्धी फोटो प्रदर्शनी (फोटो फिचरसहित)
नेपालगन्ज : फोटो सर्कलको आयोजनामा नेपालगन्जमा ‘सार्वजनिक जीवनमा महिला’ सम्बन्धी तीन दिने निःशुल्क फोटो प्रदर्शनी सुरु भएको छ ।
रामलीला मैदानमा आगामी ६ चैत्रसम्म प्रदर्शनी रहनेछ । प्रदर्शनीमा राखिएका फोटोहरुमा पूर्वको मेचीदेखि सुदूरपश्चिमको महाकालीसम्मका विभिन्न जिल्लाका महिला सम्बन्धी ऐतिहासिक फोटोहरु समावेश गरिएका छन् । फोटोमा मितिसहित महिलाहरुले राजनीति, समाज सेवा, शिक्षा, साहित्य तथा यात्राका क्रममा गरेका अनुभव तथा देश, विदेशमा महिलाले गरेको योगदानबारे क्याप्सनसहित चर्चा गरिएको छ । महिला केन्द्रीत म्यागेजिन, किताबका पाना तथा विभिन्न पम्पिलेट समेत प्रदर्शनीमा राखिएको छ ।
सोमबार नेपालगन्जको उद्घाटन समारोहमा कथाकार सनत रेग्मी, खजुरा गाउँपालिकाका पूर्वउपाध्यक्ष एकमाया विक र फोटो प्रदर्शनी कार्यक्रमका संयोजक सरिता सिंहले महिलाले गरेको योगदानबारे चर्चा गरेका थिए ।
प्रदर्शनीका लागि नेपालगन्जमा कालपृष्ठ दैनिक, नारी विकास केन्द्रीय कार्यालय, फातिमा फाउन्डेसन नेपाल, क्रियाशील पत्रकार महिला बाँके, वागेश्वरी असल शासन क्लब, नेपालगन्ज ग्यालरी, चलचित्र पत्रकार सङ्घ नेपाल बाँके र मेरो खुसी डटकमसँग साझेदारी गरिएको छ ।
