महिला फोटो प्रदर्शनीमा विद्यार्थीको आकर्षण (फोटो फिचर)
नेपालगन्ज : बाँकेको नेपालगन्जस्थित रामलीला मैदानमा जारी महिलाको फोटो प्रदर्शनीमा विद्यार्थीको आकर्षण देखिएको छ ।
नेपाल पिक्चर लाइब्रेरीको आयोजनामा सार्वजनिक जीवनमा महिला : महिलावादी स्मृतिको एक पहल शीर्षकको ३ दिने निःशुल्क फोटो प्रदर्शनीमा नेपालगन्जका सामुदायिक र संस्थागत विद्यालयका विद्यार्थी अवलोकन गर्न आइरहेका छन् ।
नेपालको शिक्षा, समाज, राजनीति लगायतका क्षेत्रमा योगदान दिएका महिलाहरुको बारेमा गरिएको खोज अनुसन्धानलाई फोटो प्रदर्शनीमार्फत प्रस्तुत गरिएको कार्यक्रम संयोजक सरिता सिंह बताउँछिन् ।
पहिलो चरणमा वीरगन्ज र जनकपुरमा प्रदर्शनी सकेर दोश्रो चरणमा सुर्खेतपछि नेपालगन्जमा यो कार्यक्रम आयोजना गरिएको हो ।
प्रदर्शनीमा नारी विकास केन्द्रिय कार्यालय नेपालगन्ज, फातिमा फाउन्डेसन नेपाल, बास नेपाल केन्द्रीय कार्यलय नेपालगन्ज, कालपृष्ठ दैनिक, क्रियाशील पत्रकार महिला बाँके, चलचित्र पत्रकार संघ नेपाल बाँके, र मेरोखुसी डट कमले मिडिया पार्टनरका रुपमा साँझेदारी गरेका छन् भने सोसल मिडिया पार्टनर नेपालगन्ज ग्यालरी रहेको छ ।
