प्रचण्ड भन्छन्, ‘गैंडा तस्करीमा दरबारिया ब्यक्ति नै संलग्न छन्’
नेपालगन्ज : पूर्वप्रधानमन्त्री पुष्पकमल दाहाल प्रचण्डले नेपालमा एक सिंगे गैंडाको खाग तस्करीमा पनि दरबारियाकै संलग्नता रहेको आरोप लगाएका छन् । हुलाकी राजमार्ग केन्द्रीत जनतासँग माओवादी तराई मधेश जागरण अभियानका क्रममा बाँके पुगेका नेकपा (माओवादी केन्द्र)का अध्यक्षसमेत रहेका प्रचण्डले बिहीबार प्रेस सेन्टरले नेपालगन्जमा आयोजना गरेको पत्रकार सम्मेलनमा मूर्तिसँगै गैंडाको खाग तस्करीमा दरबारियाहरु नै संलग्न रहेको जिकिर गरेका हुन् ।
उनले भने, ‘गैंडा केसमा पनि मूर्ति केसमा पनि हिजोका दरबारीयाहरुको संलग्नता रहेको कुरा बच्चाबच्चालाई पनि थाहा छ नि । आजभोलि भर्खर जन्मेकाहरुलाई थाहा नहोला । तपाई हाम्रो पालाको सबैलाई थाहा छ नि ।’
जनतासँग माओवादी तराई मधेश जागरण अभियान अन्तर्गत नेपालगन्जमा नागरिक समाजसँग छलफ कार्यक्रममा अध्यक्ष प्रचण्डले पूर्वराजा ज्ञानेन्द्रलाई आफूले र आफ्नो पार्टीले कहिल्यै राजा नमानेको भन्दै नक्कली राजा र व्यापारी मात्र भएको जिकिर गरेका थिए । अध्यक्ष प्रचण्डले निरंकुशतावादी र गणतन्त्रवादी आमने सामने भएकाले सचेत रहन कार्यकर्तालाई निर्देशन दिए । ‘अहिले नै आत्तिहाल्ने अवस्था त होइन । स्थिति नराम्रो पनि हुनसक्छ । निरंकुशता र प्रतिक्रियावादीको षड्यन्त्र हुनसक्छ । अहिले सचेत रहनुपर्ने अवस्था छ’, उनले जोड दिए, ‘गणतन्त्र र निरंकुशतन्त्र आमने सामने भएका छन् । जतनाले जित्ने हो कि, निरंकुशतन्त्रले जित्ने ? जनताले जित्दा गणतन्त्र सुदृढ हुने हो, विकास र समृद्धिको यात्रा अझ सुदृढ भएर अघि बढ्ने हो । निरंकुशतन्त्रले जित्यो भने ठूलो भूमरीमा पर्ने हो ।’ विगतका गल्तीकमजोरी पार्टीभित्र आत्मालोचना र आत्मसमीक्षा गरेर आफू जनतामाफ आएको बताए ।
