होटल पौवाले २ लाख जनालाई सित्तैमा खाना खुवाएर स्वाद उत्सव गर्दै
नेपालगन्ज : होटल पौवाले स्थापनाको ९औँ वार्षिकोत्सवको अवसर पारेर देशभरका होटल तथा रिसोर्टमा स्वाद उत्सव गर्न लागेको छ ।
अध्यक्ष दुर्गाप्रसाद भण्डारीका अनुसार होटलको ९औँ वार्षिकोत्सवको अवसरमा देशभरका शाखाहरूमा विभिन्न कार्यक्रमसहित पौवाले स्वाद उत्सव मनाउन लागेको हो । ‘जहाँबाट आतिथ्यको सुरुवात हुन्छ’ भन्ने मूल मन्त्रका साथ नेपालका लागि नेपाली हस्पिटालिटी सहितको सेवा दिने उद्देश्यले पौवा होटल स्थापना गरिएकोे थियो । यही चैत्र २५ गतेदेखि २९ गतेसम्म पौवाका देशभरका १८ वटा शाखामा आयोजना हुने स्वाद उत्सवमा नेपाली स्वाद संस्कृति झल्किने मौलिक खाना खुवाउने छ । जसका लागि पौवाले दुई लाख पाहुनाहरुलाई निमन्त्रणा पत्र पठाएको छ । उत्सवमा आउने सबै पाहुनाहरुले सित्तैमा खानाका परिकारको स्वाद लिन पाउनेछन् ।
होटल पौवा प्रालिका सिइओ कृष्ण गौतम भन्छन्, ‘पौवा होटलका परिकारबारे ग्राहकबाट तत्काल प्रतिक्रिया लिएर सुधार गर्न स्वाद उत्सव आयोजना गर्न लागेका हौं ।’
पौवा ‘मिसन १००’ को लक्ष्य पच्छ्याउँदै देशभर विस्तारित गरिरहेको पौवाका मधेश प्रदेश बाहेक देशका अरु सबै प्रदेशमा शाखा रहेका छन् ।
नेपालगन्जमा भने पौवाले एक अर्ब रुपैयाँको लागतमा पाँच तारे ९ तले होटल निर्माणाधीन छ । जहाँ ५ वटा रेष्टुरेन्ट, ४ वटा ठूलो सभा हलसहित १४ वटा मिटिङ हल, ७ वटा स्वीट रुमसहित ९६ वटा डिलक्स रुम उपलब्ध हुनेछन् ।
