प्रथम शिखा जिल्ला स्तरीय पौडी प्रतियोगिताको उपाधि आयोजक शिखा एकेडेमीलाई

कोहलपुर : प्रथम शिखा बाँके जिल्ला स्तरीय अन्तरविद्यालय पौडी प्रतियोगिताको उपाधि आयोजक c जितेको छ ।
नेपालगन्ज पौडी क्लबको समन्वयमा कोहलपुर–८ पिपरी (नयाँ बस्ती)स्थित शिखा एकेडेमीकोे पौडी पोखरीमा भएको प्रतियोगिताको २९ इभेन्टमा आयोजक शिखाले ६६ अंक ल्याएर उपाधि जितेको होे । शिखाका लागि समुयाल विश्वकर्मा, सुमित वाग्ले, अनमोल खत्री, इभान्सु भट्टराई, सिजन थापा, कृशल भण्डारीलगायतले स्वर्ण पदक जिताएका थिए ।
नेपालगन्जको स्प्रिङ डेल स्कुुल ४४ अंक ल्याएर दोस्रो भएको थियो । स्प्रिङ डेल एकेडेमी नेपालगन्जका खेलाडी सुशान्त बोहोरा एक्लैले ५ वटा स्वर्ण पदक जिते । सोही स्कुलबाट अमित रावलले ३ स्वर्ण र नित्यश्री दहितले एक स्वर्ण पदक जिताएका थिए ।

१७ अंक ल्याएर आदर्श माध्यमिक विद्यालय तेस्रो भएको थियो । आदर्श माविका लागि संस्कार न्यौपानेले २ स्वर्ण र समृद्धि न्यौपानेले १ गरी ३ स्वर्ण जितेका थिए । नेपालगन्जको जय बागेश्वरी माध्यमिक विद्यालयका एक मात्र खेलाडी अभियान श्रेष्ठ एक्लैले ३ स्वर्ण पदक जितेका छन् ।

भेरी प्राविधिक शिक्षालयबाट सुप्रिया रावलले दुुई स्वर्ण र बागेश्वरी एकेडेमी कोहलपुरकी सकिरा रासकोटीले पनि दुई स्वर्ण पदक जितेकी थिइन । सोफिया रेसिडेन्टल स्कुल नेपालगन्जका लागि विधेयक खनालले एक मात्र स्वर्ण पदक दिलाएका थिए ।

प्रतियोगितामा बाँके जिल्लाका १६ वटा विद्यालयको सहभागिता रहे पनि ७ वटा विद्यालयले मात्र स्वर्ण जितेका थिए । प्रतियोगितामा सर्वाधिक ५ वटा स्वर्ण पदकका विजेता सुशान्त बोहोरालाई सर्वोत्कृष्ट खेलाडी घोषित गरिएको थियो । खेलाडी बोहोराले आफूले स्पर्धा गरेका ५ वटै इभेन्टमा स्वर्ण पदक जितेका थिए ।

नेपाल पौडी संघ लुम्बिनी प्रदेशका उपाध्यक्ष सन्जय थापा, नेपालगन्ज पौडी क्लबका अध्यक्ष केशव न्यौपाने, लुम्बिनी प्रदेश खेलकुद परिषद्का पूर्व उपाध्यक्ष नरेन्द्र थापा, विद्यालयका सिइयो डा.राजकुमार सुवेदी, पत्रकार शंकरप्रसाद खनाल, अतिरिक्त क्रियाकलाप संयोजक सूर्यमणि अधिकारीलगायतले विजेता खेलाडीलाई शिल्ड, मेडल र प्रमाण पत्र वितरण गरेका थिए ।