शिखा एकेडेमीमा अन्तर्राष्ट्रिय मापदण्डकोे फुटसल कोर्ट बनाउन सुरु
कोहलपुर : लुम्बिनी प्रदेशमै पहिलो पटक विद्यालयमा पौडी पोखरी बनाएकोे बाँके कोहलपुरको शिखा एकेडेमीले अन्तर्राष्ट्रिय मापदण्डको फुटसल बनाउन सुरु गरेको छ । विद्यालयमा फुटबलका पारखीहरुका लागि भने छुट्टै फुटबल कोर्ट छ ।
फुटसलको अन्तर्राष्ट्रिय मापदण्ड अनुसार २५ मिटर चौडाइ र ४२ मिटर लम्बाइको फुटसलको शनिबार शिलन्यास गरिएको हो । कार्यक्रमका प्रमुख अतिथि नेपाल पौडी संघ लुम्बिनी प्रदेशका उपाध्यक्ष सन्जय थापा, विद्यालय व्यवस्थापन समितिका अध्यक्ष गोपाल अधिकारी, नेपालगन्ज उद्योग वाणिज्य संघका पूर्वअध्यक्ष कृष्णप्रसाद श्रेष्ठलगायतले संयुक्त रुपमा फुटसल भवनको शिलन्यास गरेका हुन् ।
बाँके जिल्लामा सबैभन्दा धेरै क्षेत्रफल ५ बिघामा विद्यालय रहेको शिखामा २५ मिटर लम्बाइ र साढे १२ मिटर चौडाइको पौडी पोखरी, बास्केटबल, क्रिकेट, फुटबल मैदान पनि रहेको छ । विद्यालयका सिइयो डा.राजकुमार सुवेदीले गुणस्तरीय शिक्षाका लागि दैनिक ४ वटा विषय मात्र पढाउने गरेको बताए । उनले भने, ‘हामी विद्यार्थीलाई भार नपर्ने गरी पाठ्यक्रमको शिक्षा दिन्छौं । यसको अलावा विद्यार्थीको रुची अनुसार खेलकुद, गीतसंगीत, नृत्य र पब्लिक स्पिकिङ कला मार्फत उनीहरुको ज्ञान सीप र क्षमता विस्तारको काम गरिरहेका छौं ।’
