सामाजिक सञ्जालमा बुबाको फोटो राखेर सम्झना र सम्मान
नेपालगन्ज : कुशे औंसीको दिन शनिबार बुबाको सम्झना र सम्मानमा सामाजिक सञ्जाल फोटोले भरिएका छन् । बुबा हुनेले भेटेका, आशिर्वाद थापेका र स्वर्गीय बुबाको सम्झना र सम्मानमा पनि सन्तानले स्टाटस लेखेका छन् । फेसबुक, टिकटक, एक्स, इन्ट्राग्रामलगायतका सामाजिक सञ्जाल बुबाका फोटो र भिडियोले भरिएका हुन् ।
भाद्र कृष्ण अमावस्या अर्थात् कुसे औंसीका अवसरमा हिन्दु धर्मावलम्बीहरू वर्षभरि देवकार्य तथा पितृकार्यमा पवित्र मानी प्रयोग गरिने कुश पनि घर घरमा भित्र्याएका छन् ।
आजका दिन पितृदेवो भवु भन्ने मान्यताअनुरूप आफ्ना बाबुलाई मन पर्ने मिठाई, भोजन खुवाई मुख हेर्ने र यथोचित सम्मान गर्ने परम्परा रहिआएको छ । यस अवसरमा आज बाबु नहुनेहरूले पितृको तृप्ति एवं कल्याणको कामना सम्झनास्वरूप श्राद्ध, तर्पण आदि गर्ने चलन छ ।
