मानव बेचबिखन र लागूऔषध दुर्व्यसनबिरुद्ध सरोकारवाला एकैस्थानमा !
संजय आचार्य । गुलरिया
मानव बेचबिखन रोकथाम र लागूऔषध दुर्व्यसन नियन्त्रण गर्न बर्दियाका सरोकारवालाहरु एकसाथ जुटेका छन् ।
लैङ्गिक हिंसाविरुद्धको १६ दिने अभियानअन्तर्गत गुलरिया नगरपालिका, जिल्ला प्रहरी कार्यालय, महिला बालबालिका तथा जेष्ठ नागरिक सेवा केन्द्र बर्दिया र शान्ति पुनस्र्थापना गृह बर्दियाले सीमा नाकाबाट दैनिक रुपमा आवत–जावत गर्ने सर्वसाधारणलाई लक्षित गरी सचेतना कार्यक्रममा सहकार्य गरेका हुन् ।
सीमा क्षेत्र संवेदनशील मानिने भएकाले त्यहाँ लैङ्गिक हिंसा न्यूनीकरण, मानव बेचबिखन रोकथाम र लागूऔषध दुर्व्यसन नियन्त्रणका विषयमा प्रत्यक्ष रूपमा जानकारी तथा सचेतना फैलाउने उद्देश्यले कार्यक्रम गरिएको आयोजकले बताए।
कार्यक्रममा शान्ति पूर्णस्थापना गृह बर्दियाकी संयोजक सपना शर्माले आफ्नो संस्थाले विगत लामो समयदेखि सीमा नाकामा रहेर लैङ्गिक हिंसा, मानव बेचबिखन तथा लागूऔषध दुर्व्यसन नियन्त्रणका क्षेत्रमा काम गर्दै आएको जानकारी गराइन्।
उनले सीमा क्षेत्र अझै पनि जोखिमयुक्त रहेको बताउँदै नियमित तथा प्रभावकारी सचेतना कार्यक्रमहरु निरन्तर सञ्चालन गर्न आवश्यक रहेकोमा जोड दिइन्। जनस्तरमा अझै पनि गलत बानी, कुसंस्कार र सूचना अभावका कारण जोखिम उच्च देखिएको उनले उल्लेख गरिन्।
कार्यक्रमकी अध्यक्ष पनि रहेकी गुलरिया नगरपालिकाका उपप्रमुख सावित्रा गौतमले खुला सीमा नाका कारण लागूऔषधको ओसारपसारदेखि अन्य अवाञ्छित गतिविधिहरू भइरहेको बताइन्। युवा वर्ग बढी प्रभावित भएका कारण उनीहरूलाई लक्षित गरी व्यवहारिक, मनोसामाजिक तथा पुनर्स्थापना–मुखी कार्यक्रम सञ्चालन गर्नुपर्ने उनले बताइन्। नगरपालिकाले सचेतनामूलक कार्यक्रमलाई निरन्तरता दिँदै लैङ्गिक हिंसा तथा सामाजिक विकृति न्यूनीकरणमा सक्रिय रूपमा काम गरिरहेको पनि उनले जानकारी गराइन्।
जिल्ला प्रहरी कार्यालय बर्दियाका प्रहरी निरीक्षक लोकराज अवस्थीले सीमा क्षेत्रमा लागूऔषध ओसारपसार, मानव बेचबिखन तथा आपराधिक घटनामा संलग्न समूहहरूलाई नियन्त्रण गर्न प्रहरी प्रशासन लगातार सचेतना, अनुगमन र निगरानीमा जुटिरहेको बताए। उनले समुदाय, स्थानीय सरकार र प्रहरीबीचको सहकार्यले मात्र जोखिम न्यूनीकरण हुन सक्ने भएकाले यस्ता कार्यक्रमको महत्व ठूलो रहेको बताए।
सो कार्यक्रममा स्थानीय समुदायका व्यक्तिहरु, सुरक्षा निकायका अधिकारी तथा विभिन्न संघ–संस्थाका प्रतिनिधिहरू लगायत सन्चारकर्मीको सक्रिय सहभागिता रहेको आयोजकले जनाएको छ। सहभागीहरूले यस्ता कार्यक्रमले सीमा क्षेत्रमा देखिएका जोखिम कम गर्न सहयोग पुर्याउने विश्वास व्यक्त गरे।
गुलरिया नगरपालिका वडा नं. ११ मा बिहीबार ‘प्रविधिको सही प्रयोग गरौँ, लैङ्गिक हिंसा अन्त्य गरौँ’ भन्ने राष्ट्रिय नाराका साथ आयोजना गरिएको सो कार्यक्रम गुलरिया नगरपालिकाका उपप्रमुख तथा अभियान मूल समारोह समितिका अध्यक्ष सावित्रा गौतमज्यूको अध्यक्षतामा सम्पन्न भएको हो।
