जेन्जी आन्दोलनपछि बाँकेका अधिकारकर्मी सेल्फ सेन्सरसीपमा !
नेपालगन्ज : बाँकेका अधिकारकर्मीहरु जेन्जी आन्दोलनपछि अदृश्य आन्दोलनकर्मीको त्रासमा सेल्फ सेन्सरसीपको अवस्थामा पुगेका छन् ।
शान्तिका लागि साझा अभियान (कोक्याप)ले शनिबार नेपालगन्जमा आयोजना गरेको लुम्बिनी प्रदेशको नागरिक स्थानको अवस्था विश्लेषण तथा परामर्श विषयक कार्यक्रममा जिल्लामा कार्यरत अधिकारकर्र्मीहरुले विगत साढे तीन दशकमै पहिलो पटक अधिकारकर्मी यो अवस्थामा पुगेको भन्दै चिन्ता ब्यक्त गरेका हुन् ।
कार्यक्रममा एड्भोकेसी फोरमका लुम्बिनी प्रदेश संयोजक वसन्त गौतम, द्वन्द्व पीडित एकल महिला सञ्जालका केन्द्रीय सचिव एकमाया विक, गैरसरकारी संस्था महासंघ लुम्बिनी प्रदेश सहसचिव शंकर न्यौपाने, सिविन नेपालगन्जका प्रमुख सिद्ध पनेरु, नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई, एफा बाँकेका शोभना मिश्र, सामुदायिक वन उपभोक्ता महासंघ बाँकेका अध्यक्ष सावित्रा पुन, बास नेपालका हेमराज भट्ट, युवा गैसस महासंघका मनमोहन वर्मा, लगायतका वक्ताहरुको एउटै जोड थियो, ‘चाहे २०४६ साल होस् । १० वर्षे द्वन्द्वकाल होस् वा ०६२/०६३ को जनआन्दोलनमा आन्दोलनकारी स्पष्ट चिनिएका थिए । जेन्जी आन्दोलनको न नेतृत्व छ, न जिम्मेवारी लिइन्छ । जनधनमाथि क्षति गरिएको छ । त्यसैले अहिले अधिकारकर्मीलाई पनि सुरक्षा थ्रेट बढेको छ । अधिकारकर्मीहरु सेल्फ सेन्सरसीपको अवस्थामा पुगेका छन् । अधिकारको क्षेत्रमा सहकार्य र समन्वय गरेर साझा मुद्दामा काम गर्नुपर्छ ।’
राष्ट्रिय मानव अधिकार आयोग नेपालगन्ज कार्यालय प्रमुख द्वारिका अधिकारीले अधिकारकर्मीहरुलाई लुकेर नबस्न, आवाज बुलन्द बनाउन र काम निरन्तर गर्न आग्रह गर्दै आफूले साथ र सहयोग गर्ने प्रतिबद्धता जनाएकी थिइन् ।
कोक्याप लुम्बिनी प्रदेश अध्यक्षको अध्यक्षतामा सम्पन्न कार्यक्रममा संस्थाका सरोज नेपाल र महेश भट्टले जेन्जी आन्दोलनपछि लुम्बिनी प्रदेशमा नागरिक स्थानका बारेमा प्रस्तुतीकरण दिएका थिए ।
प्रस्तुतीसँगै खुला छलफलमार्फत धारणा राख्न लगाइएको थियो । कार्यक्रममा कोक्यापका केन्द्रीय अध्यक्ष पुष्प भुुसाल, केन्द्रीय कोषाध्यक्ष शिवलाल पाण्डेले बदलिँदो राजनीतिक अवस्थामा कोक्यापको भूमिकाबारे जानकारी गराएका थिए ।
