४ मुक्तक : तिमी, म अनि…

 

नरेन्द्र देवकोटा ‘प्रशान्त’

केही भारी तिमी बोक केही भारी बोकुँला म
तिम्रो घर  आँगनीमा  लौ आएर  खोकुँला म
मुटु  भरी  आँखा  भरी  तिमीलाई   सजाएर
देउराली  चढ्दै  गर्दा  तिमीलाई  बोकुँला  म ।

OOO

मेरो सामु नआउ तिमी समस्याका पेटारा छन्
फुकाउन    नसकिने   धेरै   धेरै   कुटिरा  छन्
कस्ले   गर्ला   उपचार  कस्ले  गर्ला  समाधान
जतिखोल्यो उतिउति ती पिडाका खटिरा छन् ।

OOO

म नै  गर्छु यो  मुलुकको  रक्षा भन्ने कोही छैन
चाह  मेरो  बिकासको  भन्ने पनि  कोही  छैन
आफै  ठूलो आफै राम्रो  भन्ने मात्र  देखेको छु
देश   रहे  तब   रम्छु  भन्ने  पनि   कोही  छैन ।

OOO

तिम्रो पनि  भूमिका छ , मेरो  पनि भूमिका  छ
नागरिक नेता  सबै  मिली  जुट्नि भूमिका छ
फुट्नि  हैन  लड्नि  हैन  बाँदर  र  बिराला झैँ
नेपालको  उन्नतिमा   एक   हुनि  भूमिका  छ ।

२०८२/९/२५ प्यूठान।