खुसी बाँड्न : मेरो खुसी

‘मुस्कानले हामीलाई आनन्द महसुस गराउँछ । जब आनन्द महसुस हुन्छ । निसन्देह खुसी प्र्राप्त हुन्छ’, मनोविद् जोन इटलको यो भनाइ जीवन अभ्यासको सार हो । खुसी मानसिक कुरा हो । जसलाई शारीरिक अवस्थाले पनि प्रभाव पार्छ । शरीर स्वस्थ र तन्दुरुस्त भयो भने खुसी अनुभव हुन्छ । जीवनप्रतिको धारणा र जिउने तरिका फरक फरक हुन्छ । त्यसैले खुसी हुने, खुसी बुझ्ने र अनुभूति सबैमा समान हुँदैन । जीवन पद्दती र अभ्यासका आधारमा खुसी प्राप्त गर्ने तरिका सिकाउने र खुसीको ज्ञान बाँड्नु नै मेरो खुसी डटकम www.merokhusi.com को मुख्य उद्देश्य हुनेछ । हाम्रो अनलाइनमा थोरै स्तम्भ छन् । सूचना, शिक्षा, मनोरञ्जन र उत्प्रेरणा प्रदान गर्न सबै उत्तिकै महत्वपूर्ण छन् । ब्यक्ति, समाज र संघसंस्थाका असल अभ्यास, विकास र समृद्धिका कथा, ज्ञान, विज्ञान तथा अध्यात्मका अनुशरणीय र अनुकरणीय कुरा हाम्रो प्राथमिकतामा पर्नेछन् ।
न्युज अपडेट स्तम्भमार्फत हामी ताजा समाचार पस्कनेछौं । छिटो समाचार दिने नाममा अपुरो, अपुष्ट, एकतर्फी, र पूर्वाग्रही समाचारमा सधैं सर्तक हुनेछौं । सत्यतथ्य र सन्तुलित समाचारमा कहिल्यै विचलित हुनेछै्रनौं । खोज, अनुसन्धान र सर्वेक्षणमा आधारित समाचारको अभ्यास गर्नेछौं । हामी कहिले सानो–सानो कुरामै धेरै खुसी हुन्छौं । कहिले अनायासै दुःखी भइदिन्छौं । सुख दुःख त एक अर्काका परिपुरक नै हुन् । दुःखमा नआत्तिने र सुखमा नमात्तिने हो भने जीवन जिउन गाह्रो हुन्न । जीवन जिउने कला जीवन विज्ञान स्तम्भले सिकाउनेछ । ब्यक्तिको तन र मनको स्वास्थताका योगध्यान खण्ड छ । धेरै रोग खानपानकै कारण लाग्छन् । कुन समयमा कस्तो खानेकुरा खाने र नखाने भन्ने विषयकोे जानकारी ‘स्वास्थ्य र खानपान’ स्तम्भमार्फत दिनेछौं ।
समृद्धि स्टोरी विकास र समृद्धिको विषयमा केन्द्रीत हुनेछ । यो स्तम्भमार्फत हामी ब्यक्ति, समूह, समुदाय, संस्था र क्षेत्रको सफलताका कथा पस्कनेछौं । असल अभ्यास उजागर गर्नेछौं । जुन प्रेरणाको स्रोत बन्नेछ । संवाद स्तम्भले हाम्रा समाचार, समृद्धि स्टोरी वा अन्य स्तम्भका सामग्रीलाई परिपूरकको रुपमा काम गर्नेछ । भनिन्छ, कि पढेर जानिन्छ, कि परेर ? विषय विज्ञको मानक हामी प्राज्ञिक ज्ञानलाई मात्र मान्नेछैनौं । अनुभवीलाई हामी विज्ञकै दर्जामै स्थान दिनेछौं ।
मेरो खुसी स्तम्भ लेख खण्ड हो । लेख खुसीसँग मात्र सम्बन्धित हुनेछ । व्यक्ति कसरी खुसी भइरहेको छ ? खुुसीको स्रोत के हुँदो रहेछ ? कहिले र किन खुसी हुन्छ ? भन्ने कुरा लेखकका अभिव्यक्तिका माध्यमबाट साँटासाँट गर्नेछौं । यो खुुसीको संगालो हो । श्रव्यदृश्य माध्यमबाट विचार, धारणा वा ज्ञान अभिव्यक्त गर्न हामीसँग मल्टिमिडिया छ ।
हामी समस्या उठान मात्र गर्नेछैनौं । समाधानका उपाय पनि बताउनेछौं । फाइदा र बेफाइदा, प्रयोग विधि र अभ्यास अनि अनुभव सबै कुराको प्याकेज पस्कनेछौं । हामी समाजलाई सूचना मात्र दिने छैनौं । त्यो सूचना व्यक्ति, परिवार, समाज, स्थानीय तह, प्रदेश, संघीय सरकार, सम्पूर्ण मानव जाति र विश्व ब्रह्माण्डका लागि सकारात्मक परिवर्तन र उर्जाको श्रोत वा मार्गदर्शक बनाउन चाहन्छौं । ‘ब्याड न्युज इज गुड न्युज’ नै ‘बेस्ट सेलर न्युज’ हो मान्ने व्यवसायिक मिडियाको विश्वव्यापी मान्यताभन्दा माथि उठेर हामी सकारात्मक सन्देश समाजका लागि बढी उपयोगी हुन्छ भन्ने स्थापित गर्न चाहन्छौ । जुन पाठक र दर्शकका लागि अभिप्रेरणा बनोस् ।
हामी अरु अनलाइन भन्दा भिन्न हुनेछौं । किनकी हामीले अरु मिडियालाई प्रतिष्पर्र्धी ठान्नेछैनौं । हरेक विषयवस्तु एकपछि अर्को गहन, पठनीय र अनुकरणीय बनाउनु नै हाम्रो मुख्य प्रतिष्पर्धा र चुनौती हुनेछ ।
खुसी ब्यक्तिमै निहीत हुुन्छ । हामी त्यही खुसी जागृत गर्र्न आएका छौं । एकको खुसी अर्कोलाई बाँड्न चाहन्छौं । यसमा तपाईको सुझाव, सल्लाह, साथ, सहयोग र सहकार्य हुनसक्यो भने पक्कै हामी कोरोना भाइरसका कारण दुःखी मनमा पनि खुुुुसीको मल्हम लगाउन सक्नेछौं ।