नेपालीलाई लक्षण बिनै कोरोना, १६ प्रतिशतमा मात्र लक्षण

नेपालगन्ज : कोरोना भाइरस (कोभिड-१९) को कुनै लक्षण देखिएन भनेर पनि ढुक्क नहुनुस् । अधिकांश नेपाली संक्रमितलाई कुनै पनि लक्षण नदेखिएर नैै कोरोना रोग लागेको अभ्यासले देखाएको छ ।
नेपालमा ३१ जना कोरोना संक्रमितमध्ये २६ जनामा कुनै प्रकारको अस्वस्थता वा बिरामी भएको लक्षण नदेखेको खबर मंगलबारको कान्तिपुर दैनिकले प्रकाशित गरेको छ । तीमध्ये तीन जनालाई मात्र ज्वरो देखिएको थियो । लक्षणविहीन संक्रमितलाई चिकित्सा भाषामा एसिम्प्टोम्याटिक भनिन्छ ।
सबैभन्दा बढी संक्रमित विराटनगरको कोसी अस्पतालमा छन् । अस्पतालकी मेडिकल सुपरिटेन्डेन्ट डा. संगिता मिश्रका अनुसार सबै संक्रमित स्वस्थ नै छन् । उनले भनेकी छन्, ‘उहाँहरुले कुनै शारीरिक अस्वस्थता पनि अनुभव गर्नु भएको छैन ।’