बाँकेमा कोरोनाविरुद्धको खोप शुभारम्भ, ढुक्क भएर खोप लगाउन चिकित्सकको आग्रह
नेपालगन्ज : बाँकेमा पहिलो चरणको कोरोनाविरुद्धको खोप अभियान बुधबारबाट शुुभारम्भ गरिएको छ ।
भेरी अस्पताल नेपालगन्ज परिसरमा रहेको खोप केन्द्रबाट अस्पतालका मेसु डा. प्रकाशबहादुर थापालाई पहिलो खोप लगाएर कोरोनाको खोप लगाउने अभियानको शुभारम्भ भएको हो । खोप कार्यक्रमको जिल्ला समन्वय समितिका बाँकेका प्रमुख अजयकुमार श्रीवास्तवले स्वास्थ्यकर्मीलाई खोप हस्तान्त्रण गरेर शुभारम्भ गरेकमा थिए । स्वास्थ्य कार्यालय बाँकेका अनुसार बुधबार भेरी अस्पतालमा रहेका चार सय ५० जना स्वास्थ्यकर्मीहरुलाई खोप लगाउने लक्ष्य रहेको प्रमुख धीरजंग शाहले बताए ।
यसैबीच खोप लगाइसकेपछि प्रतिक्रिया दिँदै भेरी अस्पतालका प्रमुख डा. प्रकाशबहादुर थापाले यो खोप सुरक्षित भएकोले कोरोनाको खोपलाई अन्य खोप सरह ठानेर ढुक्क भएर लगाउन उनले आग्रह गरे । जिल्लामा पहिलो चरणमा कोरोनाको फ्रन्टलाइनमा खटेका स्वास्थ्यकर्मी, सुरक्षाकर्मी, सरसफाइकर्मीलगायतलाई तोकिएको तालिका अनुसार खोप लगाउन सुरु गरिएको छ । जिल्ला स्वास्थ्य कार्यालय बाँकेले खोप लगाउन आउँदा आफू कार्यरत निकायको परिचयपत्र सहित तोकिएको मितिमा आइदिन सम्बन्धित सबैमा अनुरोध गरेको छ । खोप शुभारम्भ अभियान जिल्ला कोभिड १९ संकट व्यवस्थापन केन्द्रका संयोजक प्रजिअ रामबहादुर कुरुम्बांगको सभापतित्वमा भएको थियो ।
