दुःखद खबर : कैलालीमा ट्रेक्टर दुर्घटनामा २ को मृत्यु, ३० घाइते
मानबहादुर ठकुल्ला । भजनी
कैलालीमा ट्रेक्टर दुर्घटना हुँदा २ जनाको मृत्यु भएको छ भने ३० जना घाइते भएका छन् ।
भजनी नगरपालिका-९ का वडाध्यक्ष सन्दीप चौधरीका अनुसार बर्दगोरिया गाउँपालिका-६ सुगरखालमा आफन्तको घरमा पास्नीमा सहभागी भएर फर्किने क्रममा जोशीपुर गाउँपालिका-७ हजारीबारा भन्ने स्थानमा सोमबार साँझ करिब ७ बजे से १ त ८८७० न.को ट्रेक्टर अनियन्त्रित भएर दुर्घटना भएको थियो । दुर्घटनामा परी भजनी नगरपालिका-९ की चाहाना चौधरी र दिलरानी चौधरीको मृत्यु भएको हो । उनीहरूको घोडाघोडी अस्पताल सुखडमा उपचारको क्रममा मृत्यु भएको प्रहरीले बताएको छ।
इलाका प्रहरी कार्यालय जोशीपुरका अनुसार दुर्घटनामा परेर गम्भीर घाइते भएकाहरुको उपचार गर्न बर्दगोरिया अस्पताल बौनिया र घोडाघोडी अस्पताल सुखड पठाएको छ। ट्याक्टर चालक फरार भएको र खोजी कार्य भइरहेको प्रहरीले जानकारी दिएको छ । दुर्घटना बारे थप अनुसन्धान भइरहेको प्रहरीले जनाएको छ ।
