सशस्त्र प्रहरी बलद्वारा ८ किलो अवैध चाँदी बरामद
नेपालगन्ज : सशस्त्र प्रहरी बलको टोलीले नेपालगन्जमा ८ किलो अवैध चाँदी बरामद गरेको छ ।
सशस्त्र प्रहरी बल नेपाल नम्बर ३० गण हेडक्वाटर बागेश्वरीबाट खटिएको टोलीले नेपालगन्ज–१६ चौलिका चोकबाट लुकाइछिपाइ ल्याउँदै गरेको आठ लाख ६७ हजार ७१५ रुपैयाँ बराबरको चाँदी बरामद गरेको हो । भारतबाट नेपालतर्फ आउँदै गरेको युपी ३२ इके ८१९६ नम्बरको भारतीय नम्बर प्लेटको मोटरसाइकललाई शंका लागेर चेकजाँच गर्दा ५ किलो ७८५ ग्राम काँचो र २ किलो ५११ ग्राम गरगहना गरी जम्मा ८ किलो २९६ ग्राम चाँदीसहित मोटरसाइकल बरामद गरिएको सशस्त्र प्रहरीले जनाएको छ । बरामद गरेको मोटरसाइकल र चाँदी आवश्यक कारवाहीका लागि नेपालगञ्ज भन्सार कार्यालय बुझाइएको छ ।
