टीकापुर नगर स्तरीय रनिङ्ग शिल्ड प्रतियोगिता सुरु
मानबहादुर ठकुल्ला । टीकापुर
कैलालीको टीकापुरमा नगर स्तरीय अन्तर विद्यालय खेलकुद तथा राष्ट्रपति रनिङ्ग शिल्ड प्रतियोगिता सुरु भएको छ ।
टीकापुर ७ सत्तीमा स्वास्थ्यका लागि खेलकुद राष्ट्रका लागि खेलकुद भन्ने नाराका साथ नगर स्तरीय अन्तर विद्यालय खेलकुद तथा राष्ट्रपति रनिङ्ग शिल्ड प्रतियोगिताको मंगलबार टीकापुर नगरपालिकाका नगर प्रमुख रामलाल डगौरा थारुले उद्घाटन गरेका हुन् ।
कर्णाली माध्यमिक विद्यालय सत्तीको आयोजनामा भएको उद्घाट्न कार्यक्रममा विद्यालयका पदेन सदस्य तथा टीकापुर नगरपालिका वडा न ७ का वडाध्यक्ष यज्ञप्रसाद न्यौपानेको अध्यक्षता भएको थियो भने प्रमुख अतिथि टीकापुर नगरपालिकाका नगर प्रमुख रामलाल डगौरा थारु रहेका थिए । टीकापुर नगरपालिका वडा न ६, ७, ८ र ९ का ११ सामुदायिक र ६ निजि विद्यालयको सहभागिता रहेको प्रतियोगिता उद्घाटन समारोहमा विशिष्ट अतिथि टीकापुर नगरपालिकाका शिक्षा युवा तथा खेलकुद शाखाका प्रमुख दमनसिंह चौधरी रहेका थिए । नगर स्तरीय अन्तर विद्यालय खेलकुद तथा राष्ट्रपति रनिङ्ग शिल्ड प्रतियोगितामा दौड, हाइजम्प, लङ्गजङ्ग, ज्याबलिङ्ग थ्रो, सटफुट, भलिबल लगायतका खेलमा प्रतिष्पर्धा हुने आयोजक कर्णाली माविका प्रधानाध्यापक जगवीर शाहले बताए ।
उद्घघाटन समारोहमा पूर्वविद्यालय ब्यवस्थापन समितिका अध्यक्ष इमानसिंह खडका, कालिका इङ्गलिस बोर्डिङ्ग स्कुलका अध्यक्ष नृपबहादुर कडायत, त्रिभुवन मावि बटनपुरका प्रधानाध्यापक रविन्द्र कठायत, समाजसेवी फकिरसिह कडायत र टीकापुर नगरपालिका वडा न ८ का वडाध्यक्ष दीर्घबहादुर ठकुल्ला लगायतले शुभकामना मन्तब्य राखेका थिए । यस्तै गरी टीकापुर नगरपालिका वडा न १ देखि ५ सम्मका सामुदायिक र निजि विद्यालयहरुको नगर स्तरीय अन्तर विद्यालय खेलकुद तथा राष्ट्रपति रनिङ्ग शिल्ड प्रतियोगिताको पनि टीकापुरस्थित वीरेन्द्र विद्या मन्दिरको खेल मैदानमा सञ्चालन भएको छ । दुई स्थानबाट प्रथम, दोस्रो र तेस्रो हुने खेलाडीले जिल्ला स्तरीय राष्ट्रपति रनिङ्ग शिल्डको फाइनल प्रतिष्पर्धा गर्नेछन् ।
