खजुरामा ३१ करोडको लागतमा औद्योगिक ग्राम निर्माण प्रकृया शुरु

 नेपालगन्ज : बाँकेको खजुरामा औधोगिक ग्रामको निर्माण प्रकृया शुरु भएको छ । सरकारको एक स्थानीयतह एक औधोगिक ग्राम बनाउने नीति अनुसार केन्द्र सरकार, प्रदेश सरकार र गाउँपालिकाको साझेदारीमा औधोगिक ग्राम निर्माणको काम शुरु भएको हो । गाउँपालिका वडा नं. ६ मा ३१ करोड ३० लाख २१ हजार ४७३ को लागत अनुमानमा निर्माण शुरु भएको उक्त औद्योगिक ग्राम अन्तगर्त पहिलो चरणमा प्राप्त ९२ लाख रुपैयाँको लागतमा तारबार तथा चौकीदार भवन निर्माण कार्य भइरहेको गाउँपालिकाका अध्यक्ष किस्मतकुमार कक्षपतीले जानकारी दिए । ३ बर्ष भित्र सम्पन्न हुनेगरी निर्माण भईरहेको बाँकेमा पालिकास्तरमा बन्दै गरेको एक मात्र औद्योगिक ग्रामको डिपिआरपछि निर्माण प्रक्रिया शुरु भइसकेकाले निकट भविष्यमै लगानी सम्मेलन गर्ने तयारी भएको उनको भनाई छ ।


यसैविच खजुरामा निर्माणाधीन अवस्थामा रहेको औद्योगिक ग्रामको मंगलबार उद्योग मन्त्रालयको एक टोलीले अवलोकन गरेको छ । करीब २१ बिगाहा क्षेत्रफलमा निर्माण हुने उक्त औद्योगिक ग्रामको प्रदेश सांसद आइपी खरेल, लगानी वोर्डका कार्यकारी प्रमुख सुशील भट्ट, उद्योग मन्त्रालयका सचिव चन्द्र घिमिरे, सहसचिव बलराम रिज्याल, औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेत, औद्योगिक क्षेत्र व्यवस्थापन कार्यालय नेपालगन्जका प्रमुख कृष्ण पुनलगायतको टोलीले अवलोकन गरेको हो । अवलोकनमा पुगेको टोलीलाई खजुरा गाउँपालिका प्रमुख किस्मतकुमार कक्षपतिले हालसम्म भएको कार्यप्रगतिबारे जानकारी दिएका थिए । उनले ठूला, मझौला र साना उद्योग रहने गरी निर्माण गर्न गइरहेको उक्त औद्योगिक ग्राममा विभिन्न किसिमका उद्योगहरुले आउने इच्छा व्यक्त गरेको बताए ।


लगानी वोर्ड तथा मन्त्रालयको टोलीले खजुरामा निर्माण हुने औद्योगिक ग्रामको काम अगाडि बढाउँदै स्थानीय सरकारले पनि उद्योग नीति बनाएर अगाडि बढ्नु पर्ने सुझाव दिए । हालसम्मको कामको प्रसंसा गर्दै टोलीले आर्थिक, प्राविधिक तथा भइपरी आउने सबै किसिमका सहयोग गर्ने विश्वास दिलाउँदै पछि आउन सक्ने विभिन्न किसिमका चुनौतीको सामना गर्न अहिलेदेखि नै योजना बनाउन सुझाव समेत दिए । खजुरा गाउँपालिकाका राजनीतिक सल्लाहकार भीम ओली, वडा नं.६ का अध्यक्ष साविर जोलाहा, योजना प्रमुख दिलबहादुर पौडेल र स्थानीयबासीको समेत उपस्थिति थिए ।

Leave a Reply

Your email address will not be published. Required fields are marked *