ड्युटीमा रहेका प्रहरी आफ्नै बन्दुक पड्किँदा घाइते !
मानबहादुर ठकुल्ला । टीकापुर
कैलालीमा आफैले बोकेको बन्दुक पड्किँदा ड्युटीमा रहेका एक जना प्रहरी जवान घाइते भएका छन् ।
टीकापुर नगरपालिका–७ मा रहेको प्रहरी चौकी कालाकुण्डामा कार्यरत प्रहरी जवान झंकर बोहोरा आइतबार बिहान १ः३० ड्युटीमा रहेको बेला एसएलआर राइफल पड्केर घाइते भएको इलाका प्रहरी कार्यालय टीकापुरका प्रमुख डीएसपी प्रकाश सापकोटाले बताए । उनको चिउँडोमा चोट लागेको छ ।
टीकापुर नगरपालिका–२ घर भएका बोहोरा केही दिनको विदा बसेर चौकीमा राति ड्युटीमा रहेको बेला आफैले बोकेको बन्दुकले आत्महत्याको प्रयास गरेको हुनसक्ने डीएसपी सापकोटाले आशंका गरे । उनले भने, ‘पारिवारिक कारणले आत्महत्याको प्रयास गरेको हुनसक्छ । यस विषयमा अनुसन्धान भइरहेको छ ।’ घाइते बोहरालाई उपचारका लागि काठमाडौंस्थित नेपाल प्रहरीको अस्पताल लगिएको छ । उनी खतरा मुक्त रहेको इप्रका टीकापुरले जनाएको छ ।
