कक्षपतीको संयोजकत्वमा खजुरामा मानव वेचविखनविरुद्ध समिति गठन
खजुरामा मानव वेचविखनविरुद्धको गाउँपालिकास्तरीय समिति निर्माण भएको छ । गाउँपालिका प्रमुख किस्मतकुमार कक्षपतिको संयोजकत्वमा गठन गरिएको समितिमा उपाध्यक्ष तथा न्यायिक समिति संयोजक एकमाया विक सदस्य, सामाजिक विकास समिति संयोजक फत्तेकुमारी जैसी र महिला वडा सदस्य सुवित्रा विक सदस्य र महिला तथा बालबालिका शाखा प्रमुख सुशीला न्यौपाने सदस्य सचिवमा चयन भएका छन् । त्यसैगरी इलाका प्रहरी कार्यालय धनौली प्रमुख सदस्य, प्रधानाध्यापक बुद्धि बन्जाडे, बाल अधिकार समितिबाट खर्क पुन, कानूनी सल्लाहकार विकास आचार्य, बाल क्लवबाट चेतना क्षेत्री, किशोरी संजालबाट मञ्जु थापा, स्वास्थ्य शाखाबाट सुदीप पौडेल, महिला सहकारी संस्थाबाट मुना निरौला, मानववेचविखन विरुद्ध कार्यरत शान्ति शर्मा पौडेललाई सदस्यमा चयन गरिएको छ । खजुरा गाउँपालिकाको आयोजना, माइती नेपाल र वीनरक इन्टरनेशनलको समन्वयमा गरिएको कार्यक्रममा माइती नेपालका केशव कोइराला र वीनरक इन्टरनेशनलका कमला पन्तले सहजीकरण गरेका थिए । सदस्य सचिव समेत रहेकी महिला तथा बालबालिका शाखा प्रमुख सुशीला न्यौपानेले मानव वेचविखनविरुद्ध अब वडास्तरीय समिति निर्माण गरिने जानकारी दिइन ।
