नेपालगन्जका ७१ प्रतिशत शिक्षक पुग्दैनन्, समयमै विद्यालय !
नेपालगन्ज : नेपालगन्ज नगरपालिकामा रहेका सामुदायिक विद्यालयका एक तिहाइ शिक्षक मात्र समयमै विद्यालय पुग्ने गरेको भेटिएको छ ।
नगर प्रमुख प्रशान्त विष्ट, शिक्षा महाशाखा प्रमुख गोर्खबहादुर थापालगायतको टोलीले सोमबार नगरका तीन वटा सामुदायिक विद्यालयमा गरेको छड्के निरीक्षणमा कूल ८४ जना शिक्षकमध्ये २४ जना मात्र विद्यालय समयमा पुगेका थिए । कूल शिक्षकको २८.५७ प्रतिशत मात्र समयमै विद्यालय पुग्छन् । ७१.४२ प्रतिशत शिक्षक समयकै विद्यालय पुग्दैनन् ।
मंगलप्रसाद माविमा ५३ शिक्षक कार्यरत रहेकोमा सोमबार बिहान १०.३० बजेसम्म चार जना शिक्षकले मात्रै हाजिर रजिष्टरमा उपस्थिति जनाएको पाइएको थियो । बिहान १०.१० बजे महेन्द्र माविमा पुग्दा १८ जना शिक्षकमध्ये ८ जना मात्रै हाजिर भएका थिए । कन्या माविमा १३ जना शिक्षक कार्यरत रहेकोमा एक जना स्वीकृत विदामा रहेको र अन्य १२ जना सबै शिक्षक विद्यालयमा उपस्थित भएको शिक्षा महाशाखा प्रमुख थापाले बताए । कन्या माविमा निरीक्षण टोलीले धन्यवाद दिएर फर्केको थियो । सम्पूर्ण शिक्षक कर्मचारी समयमै उपस्थित भएको,विद्यालयको चौरमा सुनसान देखिएको, शिक्षकहरुले नियमित कक्षा सञ्चालन गरेको पाइएपछि कन्या माविलाई निरीक्षण टोली धन्यवाद दिएर फर्केको हो । अन्य विद्यालयमा भने शिक्षकहरु समयमै विद्यालयमा उपस्थित नभएको, आफुखुशी विदामा बसेको, हाजिर नगरेको लगायतका कमजोरी भेटिएको थियो । निरीक्षणपछि नगर प्रमुख विष्टले विद्यालयमा अनुपस्थित शिक्षक तथा कर्मचारीलाई आवश्यक कारवाही गर्न शिक्षा शाखा प्रमुख थापालाई निर्देशन दिए । प्रमुख थापाले अनुपस्थित शिक्षकहरुलाई तत्कालै स्पष्टीकरण सोध्ने बताए ।
