भेरी अस्पतालमा कोरोना परीक्षण गर्न अझै तीन दिन लाग्ने
नेपालगन्ज : भेरी अस्पताल नेपालगन्जमा नोबेल कोरोना भाइरस (कोभिड १९) को परीक्षण गर्न अझै कम्तीमा पनि तीन दिन लाग्ने भएको छ ।
संघीय सरकारको स्वास्थ्य तथा जनसंख्या मन्त्रालयका सहसचिव डा.गुणराज लोहनीले बिहीबार टेलिफोन सम्पर्कमा राष्ट्रिय जनस्वास्थ्य प्रयोगशालाको टोली रिएजेन्ट बोकेर मेसिन परीक्षण गर्न नेपालगन्ज आउन लागेको बताए । उनले भने, ‘हामी चाँडो सेवा दिने तयारीमा छौं । छिटोमा अबको तीन दिनभित्र नेपालगन्जमा कोरोना जाँच हुुने गरी हाम्रो तयारी भइरहेको छ । त्यसका लागि काठमाडौंबाट भोलि नै टोली नेपालगन्ज जाँदैछ ।’
२५ चैत्रमा भेरी अस्पतालमा कोरोना जाँच्ने पीसीआर मेसिन भित्रिएको प्रचार मात्र गरिएको थियो । काठमाडौंबाट ल्याइएको त्यो सामानमा पीसीआर मेसिन नै नभएको रहस्य पनि मन्त्रालयले खोलेको छ । ‘२५ गते पीसीआर मेसिन आएको मैले त थाहा पाउनु प¥यो नि ?’, सहसचिव लोहनीले ठट्यौली पारामा प्रति प्रश्न गरे ।
भेरी अस्पताल प्रशासनले पनि बुधबार मात्रै पीसीआर मेसिन सप्लायर्सले दिल्लीबाट ल्याएर दिएको जनाएको स्वीकार गरेको छ । ‘हामीलाई पनि सुरुमा त पीसीआर मेसिन आयो भन्ने लाग्यो । सप्लायर्सले केही सामान पठाएर अरु सामान दिल्लीबाट मगाएको रहेछ । लकडाउनका कारण पीसीआर मेसिन आउन ढिला भयो’, अस्पतालका मेडिकल सुपरिटेन्डेन्ट डा.प्रकाशबहादुर थापाले भने, ‘हामीले निजी क्षेत्रसँग रहेको पीसीआर मेसिन ल्याएर राखेका थियौं । त्योे प्रयोग गर्न नपाउँदै हामीले अर्डर गरेको सामान आइसकेको छ ।’
पीसीआर मेसिन नआएपछि अस्पताल प्रशासनले नेपालगन्जको एक निजी प्रयोगशालासँग रहेको पीसीआर मेसिन जडान गर्ने र उसैको प्राविधिक प्रयोग गर्ने तयारी गरेको थियो । टेण्डर खोल्दा ५ दिनको म्यादमा सामान दिने भनेको सप्लायर्सले पनि समयमै सामान दिन सकेको छैन । सामान नआउँदा सम्झौता रद्द गर्ने चेतावनीसहितको लिखित र मौखिक पत्राचार पनि गर्नु परेको अस्पताल स्रोतले जनाएको छ ।
