बर्दियामा ३० पुरिया ब्राउन सुगरसहित लागूऔषध कारोबारी पक्राउ

गुलरिया : बर्दियामा ३० थान स–साना पुरिया बनाई राखेको लागूऔषध ब्राउन सुगरसहित एकजना कारोबारी पक्राउ परेका छन् ।
जिल्ला प्रहरी कार्यालय बर्दिया र लागूऔषध नियन्त्रण व्यूरो शाखा कार्यालय नेपालगन्जबाट खटिएको प्रहरी टोलीले सोमबार गुलरिया-५ सहिद गेट नजिकैबाट गुलरिया २ का ३५ वर्षिय अकलेश यादवलाई २७ ग्राम ५०० मिलिग्राम ब्राउन सुगरसहित पक्राउ गरेको हो । बा ८५ प ९८२८ नम्बरको मोटरसाइकलमा सवार यादवलाई शंका लागेर खान तलासी गर्दा निजको साथबाट उक्त लागू औषध फेला परेको जिल्ला प्रहरी कार्यालय बर्दियाका प्रहरी नायव उपरीक्षक हेमबहादुर शाहीले बताए ।
पक्राउ परेका यादवको साथबाट उक्त लागूऔषध, मोटरसाइकल र मोबाइल थान–१ सहित नियन्त्रणमा लिएर अनुसन्धान जारी रहेको नायव प्रहरी उपरीक्षक शाहीको भनाइ छ । उनले भने, ‘प्रारम्भिक अनुसन्धानमा उनी लागूऔषध ब्राउन सुगरको कारोबारी रहेको बुझिएको छ ।’